Altini, 3 vjeç

Tungjatjeta, Altin!

Altini e takojmë në oborrin e shtëpisë, në muajin shkurt ai bën 3 vjeç… Ka një buzëqeshje të ëmbël dhe kur qesh sytë e tij të mëdhenj i ndriçojnë gjithë fytyrën. Ai jeton në një shtëpi një katëshe, në fshtain Xyrë të Librazhdit. Oborri i shtëpisë është dhe këndi i tij i lojrave, këndi i tij i eksplorimeve … Shtëpia ku ai jeton është e varfër, e ndriçuar pak, por që nëna tij Manushaqja është përpjekuar ta shtrojë me qilima, që të jetë sa më e sigurtë për të birin. Kjo sepse Altini, vuan nga paraliza celebrale në njërën anë të trupit. Këmba dhe dora e majtë e trupi të tij të vogël, nuk lëvizin pothuajse fare.

Ai është fëmija i parë në familje dhe gjatë shtatzënisë prindërit e tij e kanë pritur me shumë padurim. “Mezi e prisnim! Kur isha 9-muajshe shtatzënë, kam patur tension të lartë dhe gjithashtu albuminë të lartë. Por pasi lindi djali, mjekët nuk na thanë asgjë…”- rrëfen Manushaqja, nëna e Altinit. Gjatë rritjes ajo vuri re që djali, dorën e majtë e mbante të kthyer nga përbrenda dhe të mbyllur. Por dhe kësaj rradhë mjekët i thonin, që nuk ka asgjë, do kalojë… Kaloi 1 vit dhe Altini u rrit, erdhi periudha që prindërit e mbanin nga duart për t’i mësuar refleksin e qëndrimit në këmbë dhe për të ecur. Por këmba e majtë e Altinit nuk përgjigjej…. Me këshillën e një mjeku në Elbasan, familja e vizitoi vogëlushin në Tiranë. Aty mësuan se gjatë lindjes, Altini kishte patur një dëmtim…

“Mendoja që nuk do të mund të ecte, nuk do të mund të përdorte dorën, nuk do të jetë i aftë të përballojë jetën e tij”- rrëfen ende mes lotëve Manushqja, kur kujton momentet kur ka mësuar lajmin për të birin. Koha kaloi, Altini filloi të, ecë, por këmbën e majtë e tërheq zvarrë, nuk ka siguri në të, rrëzohet shpesh… Dorën e majtë nuk e përdor mirë, nuk arrin të kapë dhe të mbajë diçka me të…

“Ne jetojmë larg, që të shkojmë në Librazhd duhet të ngrihemi shumë herët në mëngjes, të dalim në rrugën kryesore, të presim aty për makinat e rastit për të vajtur në qytet. Më pas. sërish duhet të presim që të gjejmë ndonjë makinë, e cila të na lërë në rrugë dhe  në këmbë me djalin në krah, të kthehemi në shtëpi…”- tregon Manushaqja, duke shtuar se ajo dhe bashkëshorti, duhet të punojnë tokën, të mbjellin misër dhe fasule nëse duan të kenë diçka për të ngrënë në shtëpi.

Prej Majit të 2018, Altini ka filluar të kryejë fizioterapi në shtëpi me ekipin lëvizës të specializuar “Tungjatjeta” nga World Vision. Përmirësimet e vogla kanë filluar të duken… Ai filluar ka të kapë dhe të mbajë, edhe pse për pak kohë, objekte me dorën e majtë. Kjo është diçka që jo vetëm i mbush shpirtin nënës së tij, por edhe Altinin e gëzon… Sa herë bën terapi me Dorelën, fizioterapisten e tij, ai lëshon disa “thirrje” të vogla lumturie, që tregojnë gëzim.

“Ditën e përcaktuar që do të vijnë për terapi, ai është i gëzuar, më pyet që në mëngjes për vajzat.”- na thotë Manushaqja. Terapia po e ndihmon Altinin, jo vetëm për të patur përmirësime në aspektin fizik, por edhe në të folur.

“Për ne si prindër është lumturia më e madhe, kur shikojmë përmirësime. Na mbushet shpirti kur shohim se tashmë falë fizioterapisë ai arrin të kryejë gjëra të vogla, por që më parë i kishte të pamundura”- na thotë Manushqja, e cila ëndërron që këtë Shtator, Altini të shkojë në kopësht. Për Altinin është shumë e rëndësishme që të vijojë fizioterapinë, që të ecë, të vrapojë, të shkojë në kopësht dhe të luajë si të gjithë fëmijët e tjerë. Përkrahe edhe ti programin social Tungjatjeta nga World Vision, për një fëmijëri me dinjitet.

Si mund të dhuroni:

Raiffeisen Bank

Numër llogarie: 00 3088 0359

IBAN: AL60 2021 1013 0000 0000 3088 0359

SWIFT: SGSBALTX

Kartë Debiti / Krediti: http://www.tungjatjeta.al/#dhuro

 

 

PARTNERËT TANË
 

    

 

   

 

PSE DUHET TË DHUROJ PËRMES TUNGJATJETA?

Tungjatjeta është një program social për integrimin e fëmijëve me Aftësi të Kufizuar.

Ajo çka e bën këtë program unik është fakti që fëmija nuk trajtohet në mënyrë të veçuar. Punohet me të gjithë elementët e trekëndëshit themelor që ndikon jetën e fëmijës: fëmijë, familje, komunitet. Jo vetëm fëmija merr kujdesin shëndetësor, por kujdestarët ligjorë, familjarët, bashkëmoshatarët dhe anëtarë të tjerë të komunitetit janë aktorë të planit të zhvillimit të fëmijës. Ata konsultohen dhe trajnohen për çdo rast specifik për të ndihmuar procesin e integrimit të këtyre fëmijëve.

Ekipi i World Vision në bashkëpunim me shoqatën MEDPAK  dhe Bashkinë Librazhd, menaxhojnë këtë program. MEDPAK ka një përvojë shumëvjeçare në trajtimin e Aftësisë së Kufizuar. Së bashku ata kanë marrë përsipër të mbështesin Qendrën Komunitare për Fëmijë dhe të Rinj me Aftësi të Kufizuar dhe t’i përgjigjen në mënyrë specifike secilit prej rasteve të identifikuar.

 


 

PËRMES TUNGJATJETA FËMIJA PËRFITON:

Plan zhvillimi Personal: Fëmija përfiton një vlerësim të plotë, të stadit të zhvillimin psikosocial. Ne bazë të tij, ekipi i ekspertëve harton një Plan Zhvillimi Individual për fëmijën dhe familjen e tij. Ofrohet mbështetje psikoemocionale e prindërve në zhvillimin e potencialit të fëmijëve të tyre.
Vizita në familje: Frekuenca e vizitave për cdo fëmijë bazohet në diagnozën e tij, minimalisht një herë në javë.
Fizioterapi: Për forcimin e muskujve, zhvillimin e lëvizjeve dhe qarkullim më të mirë të gjakut. Aplikohet për fëmijët me paralizë cerebrale, encofelopadi, paraplegji, distrofi muskulare etj.
Logopedi: Zhvillon të folurin dhe artikulimin e fjalëve, në mënyrë që fëmijët të mund të shprehin nevojat e tyre.
Psikoterapi: Ndihmon fëmijët me çrregullime mendore, por edhe prindërit që paraqesin një gjendje të rënduar psikologjike.
Transport: Fëmijët, sipas rastit, tranportohen drejt qendrave të posaçme për trajtime më të specializuara.
Konsultime: Aftësim i prindërve si të zhvillojnë terapinë ndaj fëmijës dhe ndërgjegjësim i anëtarëve të komunitetit mbi rastin.
Set materialesh zhvillimi dhe didaktike: Që prindërit të mund të punojnë gjatë kohës në shtëpi sipas udhëzimeve të specialistit.


 

PAMJE E PËRGJITHSHME E WORLD VISION ALBANIA

World Vision në Shqipëri është një organizatë e krishterë humanitare, zhvillimi dhe avokatie e cila punon në 220 komunitete në nevojë, në 10 rajone që prej vitit 1999. Përmes mobilizimit komunitar ndihmon në mbrojtjen, edukimin, fuqizimin dhe gjithpërfshirjen e 32 mijë fëmijëve dhe të rinjve më nevojtarë në Shqipëri. World Vision gjendet edhe në vende të tjera te Ballkanit Perendimor që pas krizës ndër-etnike në këtë rajon. World Vision është një nga organizatat më të mëdha në fushën e zhvillimit të  fëmijëve dhe të rinjve në botë. Në Shqipëri, ne punojmë përmes programit të mbrojtjes së fëmijëve, rinisë dhe edukimit.

Në arenën ndërkombëtare, World Vision, ka filluar veprimtarinë e vet më 1950 dhe aktualisht vepron në pothuajse 100 vende.

Keni pyetje apo komente? Na shkruani:

Na Kontaktoni

  • Rruga “Skënderbej”, Ndërtesa Gurten,
    Kati 2, Tirana, Albania
  • Phone: +355 4 2419601
  • Email: info@tungjatjeta.al

Facebook Feed

Na Ndiqni